ក្រសួងមហាផ្ទៃ បន្ដបើកវគ្គបណ្ដុះបណ្ដាលប្រព័ន្ធគ្រប់គ្រងមន្ត្រីរាជការ ក្រុមប្រឹក្សារាជធានី-ខេត្ត និងប្រព័ន្ធគ្រប់គ្រងវត្តមាន

ភ្នំពេញ៖ នៅព្រឹកថ្ងៃពុធ ទី១៨ ខែកុម្ភៈ ឆ្នាំ២០២៦ អគ្គនាយកដ្ឋានរដ្ឋបាល និងអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ បានបន្ដរៀបចំបើកវគ្គបណ្ដុះបណ្ដាល ស្ដីពីការគ្រប់គ្រង និងការប្រើប្រាស់ប្រព័ន្ធគ្រប់គ្រងមន្ត្រីរាជការ ក្រុមប្រឹក្សារាជធានី-ខេត្ត និងប្រព័ន្ធគ្រប់គ្រងវត្តមាន ជូនដល់មន្ត្រីបង្គោលមកពី រាជធានី-ខេត្តចំនួន៧ រួមមាន ៖ រាជធានីភ្នំពេញ, ខេត្តកណ្ដាល, កំពង់ស្ពឺ, តាកែវ,កំពត, កែប, និងព្រះសីហនុ។

ពិធីបើកវគ្គបណ្ដុះបណ្ដាលនេះដែរ បានរៀបចំធ្វើឡើងក្រោមអធិបតីភាព លោក អ៊ុំ ចំរើន អគ្គនាយករង និងជាតំណាង ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល, លោកឧត្តមសេនីយ៍ទោ អ៊ីវ វាសនា អគ្គនាយករង និងជាតំណាង ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ និងលោក ឆាយ វីរៈ អភិបាលរង និងជាតំណាង ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ដែលពិធីនេះប្រារព្ធធ្វើឡើងនៅសាលាប្រជុំរាជធានីភ្នំពេញ។

វគ្គបណ្ដុះបណ្ដាលនេះ មានគោលបំណងក្នុងការផ្សព្វផ្សាយ ណែនាំ និងបណ្ដុះបណ្ដាលដល់រដ្ឋបាលរាជធានី-ខេត្ត ក្នុងការប្រើប្រាស់ និងគ្រប់គ្រងលើប្រព័ន្ធគ្រប់គ្រងទិន្នន័យមន្ត្រីរាជការដែលស្ថិតនៅក្នុងរចនាសម្ព័ន្ធរបស់រដ្ឋបាលថ្នាក់ក្រោមជាតិ និងក្រុមប្រឹក្សារដ្ឋបាលថ្នាក់ក្រោមជាតិ ព្រមទាំងណែនាំលើមុខងារស្នើសុំអនុញ្ញាតច្បាប់ឈប់សម្រាករបស់គណៈអភិបាលរាជធានី ខេត្ត ក្រុង ស្រុក ខណ្ឌ តាមប្រព័ន្ធឌីជីថល ដើម្បីជួយពន្លឿននូវនីតិវិធីក្នុងការស្នើសុំអនុញ្ញាតច្បាប់ឈប់សម្រាក។

គិតមកដល់ពេលនេះ អគ្គនាយកដ្ឋានរដ្ឋបាល និងអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ក្រសួងមហាផ្ទៃ បានរៀបចំវគ្គបណ្ដុះបណ្ដាលនេះ ចំនួន ៤លើកហើយ និងលើកចុងក្រោយ រៀបចំនៅរាជធានីភ្នំពេញ ដោយមានគ្រូបង្គោលចូលរួមចំនួន ២៥រាជធានី-ខេត្ត។

សូមបញ្ជាក់ថា ប្រព័ន្ធគ្រប់គ្រងមន្ត្រីរាជការ ក្រុមប្រឹក្សារាជធានីខេត្ត និងប្រព័ន្ធគ្រប់គ្រងវត្តមាន គឺជាប្រព័ន្ធដែលត្រូវបានអភិវឌុ្ឍន៍ឡើងដោយ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ សហការជាមួយ អគ្គនាយកដ្ឋានរដ្ឋបាល ក្រសួងមហាផ្ទៃ អនុលោមតាមខ្លឹមសារ នៃយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ត្រង់មុំទី៥ និងអនុវត្តតាមខ្លឹមសារយុទ្ធសាស្រ្តទី១ និងទី៦ នៃផែនការយុទ្ធសាស្រ្តស្តីពីការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្ដាប់ធ្នាប់សាធារណៈ និងសុវត្ថិភាពសង្គមឆ្នាំ២០២៤-២០២៨ របស់ក្រសួងមហាផ្ទៃ ដែលផ្តោតទៅលើការរៀបចំស្ថាប័នរដ្ឋបាលថ្នាក់ក្រោមជាតិ ការអភិវឌ្ឍសមត្ថភាពធនធានមនុស្ស ការពង្រឹងសមត្ថភាពនៃការបំពេញការងារ ការធ្វើទំនើបកម្មប្រព័ន្ធគ្រប់គ្រងតាមប្រព័ន្ធឌីជីថល និងដោយទទួលបានគោលការណ៍ណែនាំដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្ដី រដ្ឋមន្រ្តីក្រសួងមហាផ្ទៃ ផ្តល់ជាគោលការណ៍អនុញ្ញាតដល់អគ្គនាយកដ្ឋានរដ្ឋបាល និងអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ សហការរួមគ្នារៀបចំកសាងប្រព័ន្ធឌីជីថលមួយដែលមានលក្ខណៈទំនើប ប្រមូលផ្តុំ ប្រកបដោយស្វ័យប្រវត្តកម្ម សម្រាប់គ្រប់គ្រងបញ្ជីបច្ចុប្បន្នភាពបុគ្គលិករដ្ឋបាលថ្នាក់រដ្ឋបាលក្រោមជាតិ ជាពិសេសគឺប្រព័ន្ធគ្រប់គ្រងវត្តមានរបស់គណៈអភិបាលរាជធានី ខេត្ត ក្រុង ស្រុក ខណ្ឌ និងអាចធ្វើការស្នើសុំអនុញ្ញាតច្បាប់ឈប់សម្រាកពី ឯកឧត្តម អភិសន្តិបណ្ឌិត ឧបនាយករដ្ឋមន្រ្ដី រដ្ឋមន្រ្តីក្រសួងមហាផ្ទៃ ក្នុងប្រព័ន្ធឌីជីថល តាមរយៈអគ្គនាយកដ្ឋានរដ្ឋបាល ក្រសួងមហាផ្ទៃ៕

ដោយ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ