បាត់ដំបង៖ ព្រឹកថ្ងៃចន្ទ ទី៦ ខែមេសា ឆ្នាំ២០២៦ នៅបរិវេណ ស្នងការដ្ឋាននគរបាលខេត្តបាត់ដំបង លោកឧត្តមសេនីយ៍ទោ ដាញ់ អេងប៊ុន ចាន់ស្នងការនៃស្នងការដ្ឋាននគរបាលខេត្តបាត់ដំបង និងសហការី និមន្តព្រះសង្ឃសូត្រមន្ត ចម្រើនព្រះបរិត្ត ប្រោះព្រំសិរីសួស្តី សូមសេចក្តីសុខ សេចក្តីចម្រើន ដល់អង្គភាព ថ្នាក់ដឹកនាំនិងកងកម្លាំងនគរបាលទាំងអស់នៃស្នងការដ្ឋាននគរបាលខេត្តបាត់ដំបង ក្នុងឱកាសចូលឆ្នាំថ្មី ប្រពៃណីជាតិខែ្មរ ឆ្នាំមមី អដ្ឋស័ក ព.ស.២៥៧០ ដែលនឹងចូលមកដល់នាថ្ងៃខាងមុខ។ ក្នុងពិធីនេះបានប្រគេនទេយ្យទាន មានចង្ហាន់និងបច្ច័យជាដេីមផង ចំពោះព្រះសង្ឃចំនួន ០៧អង្គ និមន្តមកពីវត្ត ប្រាបច្ចាមិត្ត ហៅវត្តក្តុល ស្ថិតក្នុងសង្កាត់ ក្តុលដូនទាវ ក្រុងបាត់ដំបង។
ក្នុងវេលាដ៏វិសេសវិសាល ឧត្តុង្គឧត្តមនេះ សូមឧទ្ទិសបុណ្យដែលកើតឡើងដោយសទ្ធាជ្រះថា្លបំផុតនោះ ក៏សូមឧទ្ទិសបុណ្យជូនចំពោះដួងវិញ្ញាណក្ខន្ធវីរកងទ័ព វីរនគរបាលជាតិ ដែលលោកបានពលីជីវិតក្នុងបុព្វហេតុជាតិ មាតុភូមិ នាពេលកន្លងទៅ សូមលោកទទួលយកនូវឥដ្ឋមនុញ្ញផល ដែលបានរៀបចំធ្វើនៅថ្ងៃនេះបានចំណែកស្មើៗគ្នា និងសូមដួងវិញ្ញាណក្ខន្ធរបស់លោក បានបដិសន្ធិក្នុងសគតិភពកុំបីអាក់ខានឡើយ៕
ប្រភព៖ ស្នងការដ្ឋាននគរបាលខេត្តបាត់ដំបង
