នៅថ្ងៃអង្គារ ទី៧ ខែមេសា ឆ្នាំ២០២៦ ឯកឧត្តមបណ្ឌិត ទូច វិសាលសុខ រដ្ឋលេខាធិការក្រសួងមហាផ្ទៃ បានអញ្ជើញជាអធិបតីដឹកនាំកិច្ចប្រជុំត្រួតពិនិត្យវឌ្ឍនភាពការងារប្រចាំត្រីមាសទី១ និងលើកទិសដៅការងារសម្រាប់ត្រីមាសទី២ ឆ្នាំ២០២៦ របស់បណ្ឌិត្យសភានគរបាលកម្ពុជា។
កិច្ចប្រជុំនេះដែរ ក៏មានការអញ្ជើញចូលរួមពី ឯកឧត្តមផាសុកបណ្ឌិត គាង សេង អនុរដ្ឋលេខាធិការ ក្រសួងមហាផ្ទៃ ឯកឧត្តមនាយឧត្តមសេនីយ៍សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា អនុប្រធានបណ្ឌិត្យសភា គ្រូនគរបាលជាតិ ប្រធាន-នាយកអង្គភាពចំណុះ និងមន្ត្រីពាក់ព័ន្ធមួយចំនួននៃបណ្ឌិត្យសភានគរបាលកម្ពុជា នាសាលប្រជុំនៃទីស្តីការក្រសួងមហាផ្ទៃ។
ជាកិច្ចចាប់ផ្តើម ឯកឧត្តមបណ្ឌិត រដ្ឋលេខាធិការ បានមានមតិបើកកិច្ចប្រជុំ និងបានអនុញ្ញាតឱ្យឯកឧត្តមនាយឧត្តមសេនីយ៍ ប្រធានបណ្ឌិត្យសភារាយការណ៍អំពីវឌ្ឍនភាពការងារដែលសម្រេចបានក្នុងត្រីមាសទី១ តាមយុទ្ធសាស្ត្រនីមួយៗនៃផែនការយុទ្ធសាស្ត្ររបស់បណ្ឌិត្យសភា រួមមាន៥យុទ្ធសាស្ត្រ៖ ១- ការងារដឹកនាំ-គ្រប់គ្រង ២- ការពង្រឹងសមត្ថភាពធនធានមនុស្ស ៣-ការលើកកម្ពស់គុណភាពអប់រំ ៤- ការពង្រីកវិសាលភាពបណ្ដុះបណ្ដាល ៥- ការពង្រឹងសមត្ថភាពស្រាវជ្រាវវិទ្យាសាស្រ្ត។
ទន្ទឹមនេះ យោងតាមប្រសាសន៍ណែនាំរបស់ឯកឧត្តមបណ្ឌិត រដ្ឋលេខាធិការ ថ្នាក់ដឹកនាំនិងប្រធានអង្គភាពចំណុះបណ្ឌិត្យសភានគរបាលកម្ពុជាបានធ្វើបទបង្ហាញពីការអភិវឌ្ឍកម្មវិធីសិក្សានិងសមត្ថភាពគ្រូនគរបាល ដើម្បីទទួលបានមតិយោបល់និងអនុសាសន៍ណែនាំបន្ថែម។
ជាកិច្ចបញ្ចប់ ឯកឧត្តមបណ្ឌិត រដ្ឋលេខាធិការ បានកោតសរសើរចំពោះការខិតខំប្រឹងប្រែងអនុវត្តការងាររបស់បណ្ឌិត្យសភានគរបាលកម្ពុជាដែលសម្រេចបានលទ្ធផលល្អប្រសើរ និងបានផ្តល់អនុសាសន៍មួយចំនួនដូចជា ពិនិត្យនិងកែសម្រួលលក្ខខណ្ឌទទួលបានឋានៈជាសាស្ត្រាចារ្យ រៀបចំបញ្ជីតម្រូវការសាស្ត្រាចារ្យតាមជំនាញ និងពិនិត្យនិងកែសម្រួលកម្មវិធីសិក្សាឱ្យបានសមស្របរវាងទ្រឹស្តី ការអនុវត្ត និងបាឋកថា៕
